रायगड ;विशेष प्रतिनिधी
रायगड जिल्ह्याच्या स्थानिक गुन्हे अन्वेषण शाखेत (LCB) एक अत्यंत धक्कादायक आणि मोठी खळबळ उडवून देणारी घटना उघडकीस आली आहे. पोलीस दलात शिस्त आणि नियमांचे पालन न केल्यास कठोर कारवाईला सामोरे जावे लागते , याचा प्रत्यय नुकताच आला आहे. रायगडच्या पोलीस अधीक्षक आँचल दलाल यांनी एकाच झटक्यात तब्बल सहा पोलीस कर्मचाऱ्यांवर निलंबनाची मोठी कारवाई केली आहे. या धडक निर्णयामुळे संपूर्ण पोलीस प्रशासनात एकच खळबळ उडाली असून शिस्तभंग करणाऱ्यांना मोठा धडा मिळाला आहे.
सविस्तर वृत्तानुसार , १ एप्रिल २०२६ रोजी रोहा तालुक्यातील वरसगाव-कमानी या परिसरात एक संशयित महिंद्रा बोलेरो पिकअप वाहन उभे असल्याचे निदर्शनास आले होते. या वाहनाची झडती घेतली असता , त्यामध्ये सुमारे १ लाख रुपये किमतीचे तांबे तसेच स्टील या धातूंचे अंदाजे २०० किलो वजनाचे तुकडे आढळून आले होते. या प्रकरणाची प्राथमिक नोंद कोलाड पोलीस ठाणे येथे अदखलपात्र स्वरूपात करण्यात आली आणि पुढील सखोल तपासाची जबाबदारी स्थानिक गुन्हे अन्वेषण शाखा (LCB) यांच्याकडे सोपवण्यात आली होती.
परंतु , या तपासादरम्यान संबंधित पोलीस कर्मचाऱ्यांनी वापरलेली कार्यपद्धती अत्यंत नियमबाह्य आणि संशयास्पद असल्याचे वरिष्ठ अधिकाऱ्यांच्या निदर्शनास आले. या प्रकरणात पोलीस उपनिरीक्षक अविनाश पाटील , हवालदार संदीप पहेलकर यांच्यासह कर्मचारी बाबासो पिंगळे , मोरेश्वर ओमले , ओंकार सोंडकर आणि लालासो वाघमोडे यांच्या कामकाजावर गंभीर प्रश्नचिन्हे निर्माण झाली. त्यांच्या या निष्काळजीपणामुळे आणि गैरवर्तणुकीमुळे पोलिसांच्या स्वच्छ प्रतिमेला मोठा धक्का पोहोचला.
या सर्व गंभीर बाबींची तात्काळ दखल घेत , पोलीस अधीक्षक आँचल दलाल यांनी या सहाही जणांना सेवेतून निलंबित करण्याचे कडक आदेश काढले. जर हे कर्मचारी सेवेत कायम राहिले , तर ते आगामी विभागीय चौकशी प्रक्रियेवर प्रभाव टाकू शकतात , या शक्यतेमुळे ही कठोर पावले उचलण्यात आली आहेत.
निलंबित झालेल्या या सर्व कर्मचाऱ्यांना निलंबनाच्या कालावधीत रायगड-अलिबाग नियंत्रण कक्ष येथे दररोज दोन वेळेस हजेरी लावण्याची सक्ती करण्यात आली आहे. त्याचबरोबर , त्यांचे शासकीय ओळखपत्र आणि किट त्वरित जमा करण्याचे आदेशही देण्यात आले आहेत. या काळात त्यांना कोणताही खासगी व्यवसाय किंवा नोकरी करण्यास पूर्णपणे मनाई असेल. आता या प्रकरणाची उच्चस्तरीय चौकशी होणार असून , यात नेमके सत्य काय आहे हे समोर येईल. जर हे कर्मचारी निर्दोष आढळले , तर त्यांना पुन्हा नियमित सेवेत रुजू केले जाईल.
