नवी दिल्ली
पश्चिम आशियातील युद्धाची आग आता अधिकच भडकू लागली आहे. इराण आणि इस्रायलमधील संघर्ष आता शेजारील देशांपर्यंत पोहोचला असून, इराणने कुवेतच्या ‘अल-साल्मी’ या महाकाय तेलवाहू जहाजाला लक्ष्य केले आहे. आज मंगळवारी पहाटे दुबई बंदराजवळ उभ्या असलेल्या या जहाजावर इराणने थेट हल्ला चढवला. या भीषण हल्ल्यामुळे जहाजाला मोठी आग लागली असून, समुद्रात तेल गळती होण्याचा धोका निर्माण झाला आहे.
नेमकं काय घडलं ?
कुवेत पेट्रोलियम कॉर्पोरेशनने दिलेल्या माहितीनुसार, मंगळवारी मध्यरात्रीच्या सुमारास ही घटना घडली. कुवेतचे ‘अल-साल्मी’ हे क्रूड ऑईलने भरलेले जहाज संयुक्त अरब अमिरातीमधील दुबई पोर्टच्या एंकरेज एरियामध्ये उभे होते. यावेळी इराणच्या सैन्याने या जहाजावर भीषण हल्ला केला. या हल्ल्यात जहाजाच्या बाह्य भागाचे प्रचंड नुकसान झाले असून मोठी आग लागली. सुदैवाने, या दुर्घटनेत अद्याप कोणतीही जीवितहानी झाल्याचे वृत्त नाही, मात्र आर्थिक आणि पर्यावरणीय नुकसानीची भीती व्यक्त केली जात आहे.
समुद्रात तेल गळतीचे संकट
जहाज तेलाने पूर्णपणे भरलेले असल्याने आग लागताच एकच खळबळ उडाली. तातडीने अग्निशमन दल आणि आपत्कालीन पथके घटनास्थळी दाखल झाली आहेत. समुद्राच्या पाण्यात कच्चे तेल पसरू नये यासाठी युद्धपातळीवर प्रयत्न सुरू आहेत. जहाजावरील क्रू मेंबर्स सुरक्षित असल्याचे प्रशासनाने स्पष्ट केले आहे.
इराणचा कुवेतवर राग का ?
गेल्या काही दिवसांपासून इराणने केवळ इस्रायलच नव्हे, तर कुवेतलाही लक्ष्य करण्यास सुरुवात केली आहे. सोमवारीच इराणने कुवेतच्या एका जलशुद्धीकरण प्रकल्पावर हल्ला केला होता. या हल्ल्यात दुर्दैवाने एका भारतीय नागरिकाचा मृत्यू झाला. या युद्धात आतापर्यंत ८ भारतीयांना आपला जीव गमवावा लागला आहे. दरम्यान, इराणने या हल्ल्याचे खापर इस्रायलवर फोडले असून, “हा आमचा हल्ला नसून आम्हाला बदनाम करण्यासाठी इस्रायलने रचलेला कट आहे,” असा दावा इराणच्या सैन्याने केला आहे.
२८ फेब्रुवारीपासून सुरू झालेले हे युद्ध आता निर्णायक वळणावर पोहोचले आहे. अमेरिका, इस्रायल आणि इराण यांच्यातील या संघर्षात आता कुवेत भरडला जात आहे. या हल्ल्यांमुळे जागतिक बाजारपेठेत कच्च्या तेलाच्या किमतींवरही मोठा परिणाम होण्याची शक्यता वर्तवण्यात येत आहे.
जाहिरात
