गेमिंग क्षेत्रात १० लाख रोजगाराच्या संधी
नवी दिल्ली :- केंद्रीय अर्थसंकल्प २०२६ मध्ये कंटेंट क्रिएटर्स आणि गेमिंग क्षेत्रासाठी मोठी घोषणा करण्यात आली आहे. अर्थमंत्री निर्मला सीतारामण यांनी सांगितले की, देशातील डिजिटल आणि क्रिएटर इकॉनॉमीला बळ देण्यासाठी १५ हजार शाळा आणि ५०० महाविद्यालयांमध्ये ‘कंटेंट क्रिएटर लॅब्स’ सुरू केल्या जाणार आहेत. या निर्णयामुळे तरुणांसाठी रोजगाराच्या नव्या संधी निर्माण होणार आहेत.
या बजेटमध्ये गेमिंग क्षेत्रात १० लाखांहून अधिक व्यावसायिकांची भरती करण्याची घोषणा करण्यात आली आहे. हे प्रशिक्षित व्यावसायिक विद्यार्थ्यांना आणि तरुणांना कंटेंट क्रिएशनचे विविध पैलू शिकवणार आहेत. यामुळे युट्यूब, सोशल मीडिया, गेमिंग आणि डिजिटल प्लॅटफॉर्मवर काम करणाऱ्या तरुणांना मोठा फायदा होणार आहे.
शाळा-कॉलेजमध्ये शिकवले जाणार कंटेंट क्रिएशन
सरकारच्या या उपक्रमांतर्गत एनीमेशन, व्हिज्युअल इफेक्ट्स, गेमिंग आणि कॉमिक्स या क्षेत्रांवर विशेष भर दिला जाणार आहे. यासाठी उभारल्या जाणाऱ्या लॅब्समधून विद्यार्थ्यांना प्रत्यक्ष प्रशिक्षण दिले जाईल. यामुळे क्रिएटर इकॉनॉमीला चालना मिळेल आणि रोजगाराच्या नव्या संधी उपलब्ध होतील.
काय आहेत ABGC कंटेंट क्रिएटर लॅब्स?
या नव्या लॅब्सना ABGC कंटेंट क्रिएटर लॅब्स असे नाव देण्यात आले आहे.
ABGC म्हणजे –
A: Animation
B: Visual Effects
G: Gaming
C: Comics
या लॅब्सचा उद्देश तरुणांना आधुनिक तंत्रज्ञानाच्या मदतीने कंटेंट निर्मितीसाठी आवश्यक कौशल्ये शिकवणे हा आहे.
AI आणि नव्या तंत्रज्ञानावर भर
अर्थमंत्र्यांनी बजेटमध्ये कृत्रिम बुद्धिमत्ता (AI) आणि नव्या तंत्रज्ञानाला भारताच्या अर्थव्यवस्थेची ताकद असल्याचे सांगितले. डिजिटल पायाभूत सुविधा मजबूत करण्यासाठी ₹१२.२ लाख कोटींची तरतूद करण्यात आली आहे. यामुळे इंटरनेट कनेक्टिव्हिटी, डिजिटल नेटवर्क आणि स्किल डेव्हलपमेंटला चालना मिळणार आहे.
